DESIR PANTAI RANAH NATA

DESIR PANTAI KERAJAAN

Oleh : Shaff Ra Alisyahbana

Datuk Imam dari Ujuong Gadieng

Mambaok dosanak ka Padang Malako,

Ratok gumam untuong nan santieng

Jauoh di sarak sanak sudaro

Rajo nan Sutan di Indopuro

Mambaok dosanak ka Linggobayu,

Apoko garan sanak sudaro

Maharok pintak kito batamu

Datuk Imam Rajo nan Sutan

Dari Ujuong Gadieng jo Indopuro,

Ratok bagumam sansaro badan

Carikan untuong santieng baleno

Padang Malako di Mudiek Ayie

Badakek jo suak Paku Lauik ,

Sanang sansaro ambiek jo rayie

Malakik awak maramu hiduik.

Dari Malako ka Kampuong Bukik

Tagak musajik di Tapieng Batu,

Badan sansaro manangguong sakik

Awak ba sakik manokan maju.

Kampuong Bukik jo Sawah Laweh

Ka sungei banamo Sawah Lambah,

Untuong basakik nan di patureh

Ma ungkei usaho di Ranah Nata.

Kampuong Bukik di lerieng bukik

Tampak nan dari Kampuong Pudieng,

Untuong basakin di erieng sulik

Sajak badiri guntuong jo sentieng.

Alah ba buni unggeh cancebo

Tando mugarib alah tibo,

Sudah ba uni Ranah Malako

Apo di lakik ba usaho.

Kontler banamo si Multatuli

Anak mudo dari Ulando ,

Geger bacinto si kandak hati

Adat mangato jo ugamo.

Upiek Ketek si anak Datuok

Umuo baru sa tungkuoh jaguong,

Adiek mengkek rancak di tampuok

Ukuo rindu sa rangkuoh dayuong.